മിടുക്കി

ചില്ല അലമാരിയിലെ പുസ്തകകൂട്ടിലിരുന്ന്
ഒരു ചങ്ങാതി പറഞ്ഞു;

ഞാന്‍  മിടുക്കിയാണ്!
അകം പൊള്ളയെങ്കിലും
പുറം മോടിയിലാണ്!

എന്റെ ഉടമ
സുന്ദരിയും മദാലസയുമാണ്!
എന്നെ ഒരുക്കിയവള്‍
ഉറക്കമെന്തെന്ന് അറിയാത്തവള്‍  !

ചിരിക്കാന്‍ പറഞ്ഞുതന്നവള്‍
സൌഹൃദത്തിന്റെ  വിലയറിയാത്തവള്‍  !

ആ ചങ്ങാതിയെ നോവിക്കാതെ
 ചില്ലലമാരിയില്‍ ത്തന്നെ വച്ചു
ഞാന്‍  തിരിഞ്ഞുനടന്നു!


ശ്രീദേവിനായര്‍               

നിസ്സംഗത്വം

കാമവെറിയുടെ ഭ്രാന്തന്‍ ചിന്തകളില്‍
ആര്‍ത്തിയുടെ വേലിയേറ്റവും
കഴുകന്‍ കണ്ണുകളില്‍ ലഹരിയുടെ
പകയുമുണ്ടായിരുന്നു.
ഉച്ഛ്വാസവായുവിന് നെറികേടിന്റെ
അഴുകിയ ഗന്ധവുമുണ്ടായിരുന്നു!

പ്രാണവായുവിനു പിടയുന്ന ജീവന്
ഗതികേടിന്റെ നിരാശയുണ്ടായിരുന്നു.
പെണ്‍ മാനം കഴുകിയെറിഞ്ഞ   തെളിനീരിന്
വിഴുപ്പലക്കിന്റെ ദുര്‍ഗന്ധവും ഉണ്ടായിരുന്നു.

അപ്പോഴും നീതി നിസ്സംഗതയോടെ
വിധി തീര്‍പ്പിനായി ആരെയോ
കാത്തിരിക്കുകയായിരുന്നു!


ശ്രീദേവിനായര്‍