സര്‍വ്വംസഹ

പ്രകൃതീ ,ഇന്ന് നീയും അസ്വസ്ഥയാണോ?
തോരാത്ത കണ്ണുനീരില്‍ കുളിക്കാന്‍,
തയ്യാറെടുക്കുകയാണോ?

വിടപറയുന്ന വീരന്മാരെക്കാണാന്‍
വരുന്ന ചെമ്പനിനീര്‍പ്പൂക്കള്‍ക്കും
ഇന്ന് കണ്ണുനീര്‍ നിറയുന്ന മുഖം..

ഈകൊടുംതണുപ്പത്തുംഞാന്‍വിയര്‍ക്കുന്നു;
കോരിച്ചൊരിയുന്ന മഴയിലും
അഗ്നിനാളങ്ങളെന്നെ വിഴുങ്ങുന്നു;

ശ്വാസത്തിന്റെതണുപ്പിന്
ശ്മശാനത്തിന്റെ ഗന്ധം ;
നിശ്വാസത്തിനാകട്ടെ,കരിഞ്ഞ
മാംസത്തിന്റെ മടുപ്പിക്കുന്ന മണം;

ഓരോഹൃദയമിടിപ്പിനും
ഒരുപെരുമ്പറയുടെ സ്വരം;
ഒലിച്ചിറങ്ങുന്ന വിയര്‍പ്പിന്,
മനസ്സുരുകിത്തീര്‍ന്ന
ദ്രാവകത്തിന്റെകൊഴുപ്പ്;

കണ്ണുകള്‍ നിറയുവാനോ,
കരയുവാനോ,നോക്കുവാനോ
ആവാതെ നിര്‍ജ്ജീവമായതുപോലെ;

ഞാന്‍ ആരെയോ തേടുന്നു;
എവിടെയോ നഷ്ടപ്പെട്ട എന്റെ
സ്വരൂപത്തിനെത്തന്നെയാണോ?